Персанальная выстава жывапісу і графікі Валерыя Песіна "Дэталі" прайшла ў сакавіку 2015 года ў Цэнтры сучасных мастацтваў (г.Мінск, вул. Някрасава, д.3).

Выстава Валерыя Песіна аб'яднала ў сабе жывапісныя і графічныя работы розных гадоў.

Разам з нядаўна створанымі работамі ў экспазіцыю ўвайшла большая частка карцін Валерыя Песіна са збору вядомага беларускага калекцыянера Яўгенія Ксяневіча.

Выстава займае учесь другі паверх мінскага Цэнтра сучасных мастацтваў і ўключае акрамя асноўнай экспазіцыі яшчэ цэлую фотагалерэю, у якой знайшоў сваё адлюстраванне ўнутраны свет мастака.

Для выставы былі адабраны творы, умоўна аб'яднаныя ў серыю "Дэталі". Дэталі - гэта не пейзаж, не нацюрморт і не сюжэт. Гэта амаль абстрактныя па форме карціны, у якіх угадваюцца элементы прыроднага свету, і каторыя аўтар напаўняе дадатковым лірычным зместам. Пры гэтым вырашальнае значэнне маюць эстэтычныя, дэкаратыўныя ўласцівасці карцін.