Гісторыя сядзібы ў вёсцы Асташына

      Сядзібна-паркавы комплекс размешчаны ў вёсцы Асташына Навагрудскага раёна Гродзенскай вобласці.

     Сёння дадзены комплекс складаецца з пабудаванага ў XVIII-XIX стагоддзях сядзібнага дома, парка агульнай плошчай каля 5,6 га і ўязной алеі працягласцю каля 1,5 км. з захаванымі экзотамі і векавымі дрэвамі.

      Комплекс агінае рака Валоўка, побач размешчаны сажалкі і млын.

Сучасны выгляд сядзібы

            Упершыню сядзіба згадваецца ў дакументах у 1401 г. як двор Навагрудскай зямлі, які належаў вялікаму князю Вітаўту. Сваёй дараванай граматай 1428 г. Вітаўт перадаў двор у пажыццёвае валоданне жонцы Юльяне. Пазней ім валодалі іншыя, не менш вядомыя ў гісторыі Вялікага княства Літоўскага асобы.

     Сядзібны дом быў пабудаваны ў канцы XVIII - пачатку XIX стагоддзяў як прамавугольны ў плане будынак, які складаецца з 1-га паверху і паўпадвалу, накрыты двускатным дахам і ўпрыгожаны ў сярэдзіне галоўнага фасада неглыбокім рызалітам з трохкутным франтонам. Архітэктура будынка мела рысы адначасова барока і класіцызму.